ਪ੍ਰਜਨਨ ਨਿਯੰਤਰਣ

ਪ੍ਰਜਨਨ ਨਿਯੰਤਰਣ ਕੀ ਹੁੰਦਾ ਹੈ?

ਪ੍ਰਜਨਨ ਨਿਯੰਤਰਣ ਉਦੋਂ ਹੁੰਦਾ ਹੈ ਜਦੋਂ ਕੋਈ ਹੋਰ ਤੁਹਾਡੀ ਪ੍ਰਜਨਨ ਸਿਹਤ ਅਤੇ ਚੋਣਾਂ ਬਾਰੇ ਫ਼ੈਸਲੇ ਲੈਂਦਾ ਹੈ। ਇਸ ਵਿੱਚ ਤੁਹਾਡੇ ਗਰਭ-ਨਿਰੋਧ ਨੂੰ ਨਿਯੰਤਰਿਤ ਕਰਨਾ, ਗਰਭਵਤੀ ਹੋਣ ਜਾਂ ਗਰਭਪਾਤ ਕਰਵਾਉਣ ਲਈ ਮਜ਼ਬੂਰ ਕਰਨਾ, ਅਤੇ ਤੁਹਾਡੀ ਸਹਿਮਤੀ ਤੋਂ ਬਿਨਾਂ ਤੁਹਾਡੀ ਪ੍ਰਜਨਨ ਸਿਹਤ ਬਾਰੇ ਫ਼ੈਸਲੇ ਲੈਣਾ ਸ਼ਾਮਿਲ ਹੋ ਸਕਦਾ ਹੈ। ਪ੍ਰਜਨਨ ਨਿਯੰਤਰਣ ਇੱਕ ਗੰਭੀਰ ਮੁੱਦਾ ਹੈ ਅਤੇ ਇਹ ਕਿਸੇ ਨਾਲ ਵੀ ਹੋ ਸਕਦਾ ਹੈ, ਪਰ ਇਹ ਖ਼ਾਸ ਕਰਕੇ ਅਪੰਗਤਾ ਵਾਲੇ ਲੋਕਾਂ ਲਈ ਨੁਕਸਾਨਦੇਹ ਹੁੰਦਾ ਹੈ।

ਪ੍ਰਜਨਨ ਨਿਯੰਤਰਣ ਇੱਕ ਗੰਭੀਰ ਸਮੱਸਿਆ ਹੈ ਕਿਉਂਕਿ ਇਹ ਤੁਹਾਡੇ ਆਪਣੇ ਸਰੀਰ ਅਤੇ ਸਿਹਤ ਉੱਤੇ ਤੁਹਾਡਾ ਨਿਯੰਤਰਣ ਖੋਹ ਲੈਂਦਾ ਹੈ। ਪ੍ਰਜਨਨ ਨਿਯੰਤਰਣ ਨੂੰ ਸਮਝਣਾ ਆਪਣੀ ਅਤੇ ਦੂਜਿਆਂ ਦੀ ਸੁਰੱਖਿਆ ਕਰਨ ਲਈ ਮਹੱਤਵਪੂਰਨ ਹੈ, ਜਿਸ ਵਿੱਚ ਉਹ ਵਿਅਕਤੀ ਵੀ ਸ਼ਾਮਿਲ ਹੈ ਜਿਸਦੀ ਤੁਸੀਂ ਦੇਖਭਾਲ ਕਰ ਰਹੇ ਹੋ। ਆਪਣੇ ਅਤੇ ਉਹਨਾਂ ਦੇ ਅਧਿਕਾਰਾਂ ਨੂੰ ਜਾਣ ਕੇ ਅਤੇ ਸਹਾਇਤਾ ਦੀ ਮੰਗ ਕਰਕੇ, ਤੁਸੀਂ ਹਰ ਕਿਸੇ ਲਈ ਸੁਰੱਖਿਆ ਅਤੇ ਭਲਾਈ ਨੂੰ ਯਕੀਨੀ ਬਣਾ ਸਕਦੇ ਹੋ।

ਇਹ ਯਾਦ ਰੱਖਣਾ ਮਹੱਤਵਪੂਰਨ ਹੈ ਕਿ:

• ਆਸਟ੍ਰੇਲੀਆ ਵਿੱਚ ਹਰ ਕਿਸੇ ਨੂੰ ਆਪਣੀ ਖੁਦ ਦੀ ਬੱਚੇ ਪੈਦਾ ਕਰਨ ਸੰਬੰਧੀ ਚੋਣਾਂ ਕਰਨ ਦਾ ਅਧਿਕਾਰ ਹੈ।
• ਪ੍ਰਜਨਨ ਨਿਯੰਤਰਣ ਕਦੇ ਵੀ ਸਵੀਕਾਰਯੋਗ ਨਹੀਂ ਹੈ।
• ਮੱਦਦ ਉਪਲਬਧ ਹੈ, ਅਤੇ ਤੁਸੀਂ ਇਕੱਲੇ ਨਹੀਂ ਹੋ।

ਪ੍ਰਜਨਨ ਨਿਯੰਤਰਣ ਦੇ ਰੂਪ

ਪ੍ਰਜਨਨ ਨਿਯੰਤਰਣ ਕਈ ਰੂਪਾਂ ਵਿੱਚ ਹੋ ਸਕਦਾ ਹੈ। ਇੱਥੇ ਇਸਦੀਆਂ ਕੁੱਝ ਉਦਾਹਰਨਾਂ ਹਨ:

• ਗਰਭ-ਨਿਰੋਧ ਨੂੰ ਬੇਕਾਰ ਕਰਨਾ: ਤੁਹਾਡੇ ਗਰਭ-ਨਿਰੋਧ ਦੇ ਤਰੀਕਿਆਂ ਨੂੰ ਛੁਪਾਉਣਾ, ਨਸ਼ਟ ਕਰਨਾ ਜਾਂ ਉਨ੍ਹਾਂ ਨਾਲ ਛੇੜਛਾੜ ਕਰਨਾ।
• ਜ਼ਬਰਦਸਤੀ ਗਰਭਵਤੀ ਕਰਨਾ: ਤੁਹਾਨੂੰ ਗਰਭਵਤੀ ਹੋਣ ਲਈ ਦਬਾਅ ਪਾਉਣਾ ਜਾਂ ਮਜ਼ਬੂਰ ਕਰਨਾ।
• ਜ਼ਬਰਦਸਤੀ ਗਰਭਪਾਤ ਕਰਵਾਉਣਾ: ਤੁਹਾਡੇ 'ਤੇ ਗਰਭਪਾਤ ਕਰਵਾਉਣ ਲਈ ਦਬਾਅ ਪਾਉਣਾ ਜਾਂ ਮਜ਼ਬੂਰ ਕਰਨਾ।
• ਗਰਭਵਤੀ ਹੋਣ ਤੋਂ ਰੋਕਣਾ: ਜਦੋਂ ਤੁਸੀਂ ਗਰਭਵਤੀ ਹੋਣਾ ਚਾਹੁੰਦੇ ਹੋ ਤਾਂ ਤੁਹਾਨੂੰ ਗਰਭਵਤੀ ਹੋਣ ਤੋਂ ਰੋਕਣਾ।
• ਬਿਨਾਂ ਸਹਿਮਤੀ ਦੇ ਨਸਬੰਦੀ: ਤੁਹਾਡੀ ਸਹਿਮਤੀ ਤੋਂ ਬਿਨਾਂ ਤੁਹਾਡੀਆਂ ਜ਼ਬਰਦਸਤੀ ਨਸਬੰਦੀ ਪ੍ਰਕਿਰਿਆਵਾਂ ਕਰਵਾਉਣਾ।
• ਗਰਭ-ਅਵਸਥਾ ਦੇ ਫ਼ੈਸਲਿਆਂ ਨੂੰ ਨਿਯੰਤਰਿਤ ਕਰਨਾ: ਤੁਹਾਡੀ ਸਹਿਮਤੀ ਤੋਂ ਬਿਨਾਂ ਤੁਹਾਡੀ ਗਰਭ-ਅਵਸਥਾ ਬਾਰੇ ਫ਼ੈਸਲੇ ਲੈਣਾ, ਜਿਵੇਂ ਕਿ ਜਨਮ ਕਿੱਥੇ ਦੇਣਾ ਹੈ, ।

ਕੋਈ ਵੀ ਵਿਅਕਤੀ ਪ੍ਰਜਨਨ ਨਿਯੰਤਰਣ ਦਾ ਸ਼ਿਕਾਰ ਹੋ ਸਕਦਾ ਹੈ, ਪਰ ਅਪੰਗਤਾ ਵਾਲੇ ਲੋਕ ਖ਼ਾਸ ਤੌਰ 'ਤੇ ਇਸ ਪ੍ਰਤੀ  ਕਮਜ਼ੋਰ ਹੁੰਦੇ ਹਨ। 

ਪ੍ਰਜਨਨ ਨਿਯੰਤਰਣ ਨੂੰ ਪਛਾਣਨਾ

ਪ੍ਰਜਨਨ ਨਿਯੰਤਰਣ ਨੂੰ ਪਛਾਣਨਾ ਔਖਾ ਹੋ ਸਕਦਾ ਹੈ, ਖ਼ਾਸਕਰ ਜੇਕਰ ਉਸ ਵਿਅਕਤੀ ਨੂੰ ਆਪਣੀ ਸਥਿਤੀ ਨੂੰ ਦੱਸਣ ਜਾਂ ਸਮਝਣ ਵਿੱਚ ਮੁਸ਼ਕਲ ਆਉਂਦੀ ਹੈ। ਇੱਥੇ ਇਸਦੇ ਕੁੱਝ ਸੰਕੇਤ ਦਿੱਤੇ ਗਏ ਹਨ:

• ਬੱਚੇ ਪੈਦਾ ਕਰਨ ਸੰਬੰਧੀ ਕੋਈ ਖ਼ਾਸ ਚੋਣਾਂ ਕਰਨ ਲਈ ਦਬਾਅ ਮਹਿਸੂਸ ਕਰਨਾ ਜਾਂ ਮਜ਼ਬੂਰ ਹੋਣਾ।
• ਤੁਹਾਡੇ ਗਰਭ-ਨਿਰੋਧ ਤਰੀਕਿਆਂ ਨੂੰ ਬੇਕਾਰ ਕਰਨਾ ਜਾਂ ਉਨ੍ਹਾਂ ਨਾਲ ਛੇੜਛਾੜ ਕਰਨਾ।
• ਇਹ ਮਹਿਸੂਸ ਕਰਨਾ ਕਿ ਤੁਹਾਡਾ ਆਪਣੀ ਪ੍ਰਜਨਨ ਸਿਹਤ 'ਤੇ ਤੁਹਾਡਾ ਕੋਈ ਕੰਟਰੋਲ ਨਹੀਂ ਹੈ।
• ਗਰਭ-ਅਵਸਥਾ ਜਾਂ ਗਰਭ-ਨਿਰੋਧ ਨਾਲ ਸੰਬੰਧਿਤ ਧਮਕੀਆਂ ਮਿਲਣਾ ਜਾਂ ਹੇਰਾਫੇਰੀ ਕੀਤੇ ਜਾਣ ਦਾ ਸਾਹਮਣਾ ਕਰਨਾ।

ਅਪੰਗਤਾ ਵਾਲੇ ਲੋਕਾਂ ਲਈ ਚੁਣੌਤੀਆਂ

ਜਦੋਂ ਪ੍ਰਜਨਨ ਨਿਯੰਤਰਣ ਦੀ ਗੱਲ ਆਉਂਦੀ ਹੈ ਤਾਂ ਅਪੰਗਤਾ ਵਾਲੇ ਲੋਕਾਂ ਨੂੰ ਵਾਧੂ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ:

• ਗੱਲਬਾਤ ਵਿੱਚ ਰੁਕਾਵਟਾਂ: ਉਹਨਾਂ ਨੂੰ ਆਪਣੀਆਂ ਲੋੜਾਂ ਸਮਝਾਉਣ ਜਾਂ ਹਿਦਾਇਤਾਂ ਨੂੰ ਸਮਝਣ ਵਿੱਚ ਮੁਸ਼ਕਲ ਹੋਣਾ।
• ਸੇਵਾਵਾਂ ਤੱਕ ਪਹੁੰਚ: ਸਰੀਰਕ ਜਾਂ ਪ੍ਰਣਾਲੀਗਤ ਰੁਕਾਵਟਾਂ ਦੇ ਕਾਰਨ ਸਹਾਇਤਾ ਸੇਵਾਵਾਂ ਨੂੰ ਲੱਭਣ ਜਾਂ ਪਹੁੰਚ ਕਰਨ ਵਿੱਚ ਮੁਸ਼ਕਲ ਹੋਣਾ।
• ਦੇਖਭਾਲ ਕਰਨ ਵਾਲਿਆਂ 'ਤੇ ਨਿਰਭਰਤਾ: ਉਹਨਾਂ ਦੇਖਭਾਲ ਕਰਨ ਵਾਲਿਆਂ 'ਤੇ ਨਿਰਭਰ ਹੋਣਾ ਜੋ ਆਪਣੀ ਸ਼ਕਤੀ ਦੀ ਦੁਰਵਰਤੋਂ ਕਰ ਸਕਦੇ ਹਨ।
• ਜਾਣਕਾਰੀ ਦੀ ਘਾਟ: ਪ੍ਰਜਨਨ ਅਧਿਕਾਰਾਂ ਅਤੇ ਸਿਹਤ ਬਾਰੇ ਜਾਣਕਾਰੀ ਤੱਕ ਸੀਮਤ ਪਹੁੰਚ ਹੋਣਾ।

ਆਪਣੇ ਆਪ ਨੂੰ ਸੁਰੱਖਿਅਤ ਰੱਖਣਾ

ਜੇਕਰ ਤੁਸੀਂ ਜਾਂ ਤੁਹਾਡਾ ਕੋਈ ਜਾਣਕਾਰ ਪ੍ਰਜਨਨ ਨਿਯੰਤਰਣ ਦਾ ਅਨੁਭਵ ਕਰ ਰਿਹਾ ਹੈ, ਤਾਂ ਤੁਹਾਨੂੰ ਸੁਰੱਖਿਅਤ ਰਹਿਣ ਵਿੱਚ ਮੱਦਦ ਲਈ ਇੱਥੇ ਕੁੱਝ ਸੁਝਾਅ ਦਿੱਤੇ ਗਏ ਹਨ:

• ਆਪਣੇ ਅਧਿਕਾਰਾਂ ਬਾਰੇ ਜਾਣੋ: ਆਪਣੇ ਪ੍ਰਜਨਨ ਅਧਿਕਾਰਾਂ ਅਤੇ ਸਿਹਤ ਵਿਕਲਪਾਂ ਨੂੰ ਸਮਝੋ।
• ਭਰੋਸੇਮੰਦ ਹੈਲਥਕੇਅਰ ਪ੍ਰਦਾਤਾਵਾਂ ਦੀ ਵਰਤੋਂ ਕਰੋ: ਉਹ ਸਿਹਤ-ਸੰਭਾਲ ਪ੍ਰਦਾਤਾ ਲੱਭੋ ਜੋ ਤੁਹਾਡੀ ਖੁਦਮੁਖਤਿਆਰੀ ਅਤੇ ਚੋਣਾਂ ਦਾ ਸਨਮਾਨ ਕਰਦੇ ਹਨ।
• ਸਹਾਇਤਾ ਗਰੁੱਪਾਂ ਨਾਲ ਸੰਪਰਕ ਕਰੋ: ਉਨ੍ਹਾਂ ਸਹਾਇਤਾ ਗਰੁੱਪਾਂ ਨਾਲ ਜੁੜੋ ਜੋ ਅਪੰਗਤਾ ਵਾਲੇ ਲੋਕਾਂ ਨੂੰ ਦਰਪੇਸ਼ ਚੁਣੌਤੀਆਂ ਨੂੰ ਸਮਝਦੇ ਹਨ।
• ਹਰ ਚੀਜ਼ ਦਾ ਦਸਤਾਵੇਜ਼ੀਕਰਨ ਕਰੋ: ਤਾਰੀਖ਼ਾਂ, ਸਮੇਂ ਅਤੇ ਵੇਰਵਿਆਂ ਸਮੇਤ, ਜੋ ਕੁੱਝ ਹੋਇਆ ਹੈ ਉਸ ਦਾ ਰਿਕਾਰਡ ਰੱਖੋ।
• ਕਿਸੇ ਭਰੋਸੇਮੰਦ ਵਿਅਕਤੀ ਨਾਲ ਗੱਲ ਕਰੋ: ਜੋ ਕੁੱਝ ਹੋ ਰਿਹਾ ਹੈ ਉਸਨੂੰ ਕਿਸੇ ਭਰੋਸੇਮੰਦ ਦੋਸਤ, ਪਰਿਵਾਰਕ ਮੈਂਬਰ, ਜਾਂ ਸਹਿਕਰਮੀ ਨਾਲ ਸਾਂਝਾ ਕਰੋ।

ਸਹਾਇਤਾ ਪ੍ਰਾਪਤ ਕਰਨਾ

ਜੇਕਰ ਤੁਸੀਂ ਪ੍ਰਜਨਨ ਨਿਯੰਤਰਣ ਦਾ ਅਨੁਭਵ ਕਰ ਰਹੇ ਹੋ, ਤਾਂ ਮੱਦਦ ਮੰਗਣਾ ਮਹੱਤਵਪੂਰਨ ਹੈ। ਤੁਹਾਡੀ ਸਹਾਇਤਾ ਲਈ ਸਰੋਤ ਅਤੇ ਸੇਵਾਵਾਂ ਉਪਲਬਧ ਹਨ।

National Disability Abuse and Neglect Hotline: ਗੁਪਤ ਮੱਦਦ ਅਤੇ ਸਲਾਹ ਲਈ 1800 880 052 'ਤੇ ਫ਼ੋਨ ਕਰੋ।

Australian Federal Police: 131 237 'ਤੇ ਫ਼ੋਨ ਕਰੋ ਜਾਂ ਉਨ੍ਹਾਂ ਦੀ ਵੈੱਬਸਾਈਟ 'ਤੇ ਜਾਓ।

ਲੀਗਲ ਏਡ ਸਰਵਿਸਜ਼: ਮੁਫ਼ਤ ਕਾਨੂੰਨੀ ਸਲਾਹ ਅਤੇ ਸਹਾਇਤਾ ਦੀ ਪੇਸ਼ਕਸ਼ ਕਰਦੀਆਂ ਹਨ। ਉਹ ਤੁਹਾਨੂੰ ਤੁਹਾਡੇ ਅਧਿਕਾਰਾਂ ਬਾਰੇ ਦੱਸ ਸਕਦੇ ਹਨ ਅਤੇ ਕਾਨੂੰਨੀ ਮਸਲਿਆਂ ਵਿੱਚ ਤੁਹਾਡੀ ਮੱਦਦ ਕਰ ਸਕਦੇ ਹਨ। ਤੁਸੀਂ ਇੱਥੇ ਆਪਣੇ ਰਾਜ ਜਾਂ ਟੈਰੀਟਰੀ ਵਿਚਲੀ ਲੀਗਲ ਏਡ ਸੇਵਾ ਲਈ ਸੰਪਰਕ ਕਰ ਸਕਦੇ ਹੋ।

ਵਧੇਰੇ ਜਾਣਕਾਰੀ ਅਤੇ ਸਹਾਇਤਾ ਲਈ, ਸਾਡੇ ਸਹਾਇਤਾ ਸੇਵਾਵਾਂ ਪੰਨੇ 'ਤੇ ਜਾਓ।